【1827】
「大家要留心，呢條就係小腸。食物營養就係呢到吸收。而對上嘅，係胃。你地見到，呢位死者，個胃穿左，正常健康嘅人，呢到係唔會有咁大個窿。不過，佢嘅死因，唔係胃潰瘍，而係心臟出問題。 」教授右手拿著解剖刀，左手捧起解剖枱上屍體血淋淋的內臟說。
教授在講台授課，圍著他的，大約有二十位醫科學生。國家正飛躍發展，對醫生需求相當龐大；同時，醫療科學這個未知的領域，仍要大量科學家潛心鑽研。教授正正就是解剖學的權威專家，亦是教導其他醫生的名師。
課堂完畢，教授接受傳媒訪問。
「醫學進步係要有代價，讀醫、做研究，一啲都唔易。解剖係核突，但係人都死左，唔切開個屍體，我地又點知人體嘅原理？醫學又點進步？點知可以用咩方法去醫其他人？所以，我先安排咁多場解剖，係解剖中發現左好多人體運作同醫病嘅方法；亦係解剖中，教育到唔同嘅醫科生去成為救人嘅醫師。」
「教授你真係好偉大，影張相先，呢邊~~」
*******************
「死開啦老嘢！慢吞吞阻住晒！」
「我日日咁比你鬧，好過癮？大家都返工，出份糧，唔包鬧呀嘛？」
唉，其實都習慣了。每天抬著一籃籃的報紙，由工場走出來，以我這個60多歲的老人家而言，一點也不易。不過，沒法子，作為一個退休軍人，每月退休金並不足夠生活，賺點外快無可口非。
人生，唯一娛樂，就只有離開工場後，上酒吧，大喝三杯。
「退休軍人，哼！年青果陣，有氣有力，咩時間都比晒國家，政府當然照顧你；年紀大無力？退休啦你，每月補貼少少生活費，夠咩？食飯，房租，邊有錢？」
「咪呻啦，飲啦，呢杯當我請你嘅。不過今晚你飲醉喇，返屋企啦，你屋企人等你㗎，下次先再飲啦~ 我收舖喇。」
「醉？我有排都未醉，我話你知，我返去都係住酒店。一個人無文無物，後生又貢獻晒比政府，老婆都無呀！等我？有，兩個包租公日日等我，等我交租呀嘛。睬佢地都傻，比埋枝威士忌我，我飲住走！」
口硬，是我的性格。其實已經走也走不動了，不過，總不能被人覺得酒量淺吧？頂著離開，應該可以的。不過真正難題，反而不是醉意，而是一會兒回到酒店，又要面對包租公們。我哪有錢交租呢？
「不如從後門爬窗進去吧。」我放輕手腳，千辛萬苦爬上二樓，終於，回到房中。躺在床上，手拿著威士忌，看著房間天花，好像... 所有以往的戰友也一同笑著出現。
「諗返以前，同你地一齊戰鬥嘅日子真係好呀！唉，真係唔想比你地睇到我而家咁折墮。如果當年一齊戰死，你話幾好呢？係呢，你地咁多人一齊黎接我呀！哈哈，真係... 榮幸...」
手中威士忌掉在地上，玻璃碎落暗淡的房間中。藉著明亮月色，照出一點點泛藍光芒，遠處看去，就像無限顆高貴寶石，為這個窮苦老兵，送上最後的離別禮物。
*******************
「肥佬，我地仲有無錢呀？」
「無乜喇，竹竿。啲人成日都唔交租，我地日日企係門口等佢地返黎，都唔係辦法。」
肥佬、竹竿，人如其名，一個肥一個瘦。二人共同開辦了一間小旅館，低價出租房間。不過，經濟不景，近來拖租十分嚴重。好像這晚，天寒地凍，他們卻只能在門口等一位租客，一位欠了他們租的老窮人。兩三小時過去，都不見有人回來。原來，那位老窮人，早已靜靜地從窗戶偷偷回到房裡。
「肥佬，聽不聽到？有打爛嘢聲？上面！」他倆箭步衝回屋內，直跑往老窮人的房中，一開門，已經看到老窮人倒在床上，手中的酒瓶碎了，玻璃散落一地。
「佢... 死左...」
「吓？咁佢欠果啲租點？我地無錢㗎喇，我地咁點算？比人知死過人，間房點租？」
「你問我，我都唔知...」
「...等等... 我或者有方法。你幫我拎塊地毯黎，包左條屍先。我去拎架手推車過黎。」
說罷，一個包好屍身；一個找來手推車，把老窮人的屍體，抬了上去。接著把車推到城裡的一個大學醫務所。
「醫生，在嗎？」拍了一分多鐘，終於有人開門。醫生睡眼惺忪，一看，兩個窮光蛋，一輛手推車，凌晨三點拍門，登時火起。
「我是教授。無做門診，睇病請離開。」
「且慢呀教授，我係黎搵你㗎。我知你要做好多示範，要教好多好醫生出黎。但係邊有咁多屍體呢？嗱，我呢到剛好有一條，佢自己死㗎，又無人無物，就咁葬左，屍體就浪費左，無晒價值。我地唔知點處理，咪黎搵你囉，起碼佢死左都可以對世界有啲作為嘛！」
「嗯，的確係。係教學上，我係需要屍體嘅。咁啦，呢條屍，我出6両黃金，有無問題？... okok，唔使比啲咁嘅反應我，7両，上限。」
肥佬竹竿兩個人，收了這7両黃金，嘻嘻哈哈地離開了。
*******************
一個月後。
「好在上個月，呀死窮鬼條屍值錢，唔係佢啲欠租都唔知點。哈！估唔到佢死左仲值錢過生勾勾。唔係喎，竹竿，你睇下？計落，有著數喎。一條屍就咁多錢，如果有得再搵多幾條屍，咪好過做旅館？」
「邊有咁多死人丫，無啦啦...」
「咁... 不如我地幫下手？反正佢地而家生活咁艱難，都生不如死㗎啦... 而且，佢地唔死，我地死呀... 竹竿... 你諗下啦... 嗱，上面二樓，係咪有個老嘢租左？上去睇左先諗啦？」
結果，他們鼓起勇氣，上了二樓。在肥佬遊說下，竹竿伸手勒住受害者的頸，徒手把生命奪走了。
「教授，又係我地呀！我地又有屍體可以比你喇。」
教授揭開布，一看，肥佬已接著說：「呢個死者係...」
「且慢，你唔使同我講，亦唔使同我解釋。我唔係警察，我而家只在意為國家培訓多啲醫師，其他一律唔想知。7両黃金，拎去。」
如是者，過後一年半，肥佬、竹竿持續進行這個買賣。後來，如果旅館沒有生意，他們便引誘路人，上房間勒殺。十多個月過去，合共賣了16條屍體給教授。
教授也是聰明人，屍體數量之多，總猜到一點。於是，為怕示範時會有人問起屍體身份，每次解剖，都改由面部頭顱開始。年半以來不停地，為來自各地的學生，進行示範解剖，一直春風化雨，風頭一時無倆。
*******************
就在第17次時，肥佬、竹竿殺人後，收藏屍體時，被一對返回旅館尋找遺失衣物的夫婦撞破。
發現連環殺手，警方大為緊張。探長分開盤問二人，但他們矢口否認殺人，只說「這條屍，是路邊拾回來的」。
「我地無辦法指控佢地㗎。失蹤16個，連屍首都無，點確定啲人已經死左？又點指控係呢兩個人殺人？點殺都唔知啦，無證據。佢地如果一直死口否認，死無對證，要放人添呀！」
「咁不如，等佢地自相殘殺？同其中一個講，只要指證另一個，就可以免罪不獲起訴？我睇個肥佬，古古惑惑，實出賣瘦果個。點，試唔試下？」
回到獨立盤問房間，警員向肥佬提出免罪交換條件。肥佬二話不說，便立即指證竹竿，並把殺人數目、賣屍方法，全盤公開，連教授的對答，也一字一句地向警方自白。
事件爆破，自然令各界不安。教授也由高高在上，一下子跌落地底，聲名狼藉。他的學生，全都成了觀賞殺人滅屍的證人。不過，說到底，教授都只是非法處理屍體，罰款了事。肥佬也因為免罪協議，逍遙法外了。惟獨僅僅竹竿一人，被判死刑。
「得我一個有罪？」這是竹竿死時最後的話。
《後記》
1。這篇其實不是故事，屬真人真事。當然，我對枝節有進行改動。
2。事件發生左1827至1829年，地點是蘇格蘭的愛丁堡。老兵欠的房租是4鎊，屍體賣7鎊。
3。肥佬、竹竿，真名分別為Burke及Hare。教授真正名字為Robert Knox，當年在揭發事件前，Knox是名聲極高的教授；事年後，流傳後世的，就只有誘導連環殺人這個污名。
4。英文生字 「burking」，其實就是起源於這件事。以Burke命名的Burking，是一種特別的勒殺手法，這方法在屍體上留下較少痕跡，令屍體可以出售予醫學院。
Search